Nadia Honiball, nasionale nuusredakteur van Netwerk24, het in 1989 as Nadia Louw gematrikuleer by La Rochelle. Sy was dux-leerling in matriek, op die leerlingraad in gr.11 en 12, het vir die eerste span netbal gespeel en wil geen onderwyser uitsonder oor die impak wat hulle op haar gehad het nie. Hulle was almal wonderlik. Sy het joernalistiek studeer by die Universiteit van Stellenbosch, was vir jare ‘n joernalis by Die Burger en daarna adjunk-redakteur by Huisgenoot voor sy hoof van nuus by Netwerk24 geword het. Sy het al van gr.8 af vir almal by die skool vertel sy gaan eendag ‘n joernalis word. Sy is getroud en ook die ma van twee seuns.

Hallo Larries

Ek gaan julle nie verveel met lang stories oor my jare by La Rochelle nie – ek was daar van gr.1 tot matriek. Oud-Larries gaan ook hoogs verveeld voel om te lees oor iemand anders se lewenspad – want ek gaan mos nou ook nie al my skandes hier kom oopvlek nie. Netnou sensor hulle my hele storie!

So ek wil eerder vir julle skryf oor die 10 goed wat ek wens ek geweet het toe ek op skool was. Dalk help dit iemand. 

1. Die cool girls gaan nie meer suksesvol of gelukkiger as jy wees eendag nie. Dis okay om ‘n nerd te wees. In vandag se konteks kan ek seker byvoeg die likes op jou Instagram of Tik Tok (ja, ek weet julle dink facebook is vir oumense) bepaal nie jou waarde nie.
2. Hoe jy lyk, is geen voorspelling van waar jy in die toekoms gaan opeindig nie – behalwe nou as jou skoonheid op die vlak van Kylie Jenner, Hayley Bieber of Gigi Hadid is. Dan hoef jy eintlik nou al niks te doen nie.
3. Die sport wat jy nou so gedwing word om te doen, gaan jy eendag so na terug verlang. Dit leer jou om in ‘n span saam te werk en dit hou jou gesond. Moenie ophou oefen na skool nie. Van ouderdom 40 af is dit net afdraende pad, heelpad.
4. Baie seuns soek regtig net een ding in hulle tienerjare – ek is jammer, regtig, dis waar. En sommige verander ook nie wanneer hulle mans word nie. Wees versigtig oor wie goed genoeg is om jou tyd en aandag te kry. (En ja, dit sluit selfs vir Harry Styles in.)
5. Dis okay om nie die slimste te wees nie. Jou baas oor twintig of dertig jaar gaan nie eens weet jy was in matriek dux-leering nie. Niemand vra jou hoeveel A’s het jy in matriek gekry nie, maar leer hard genoeg om na skool te kan doen wat jy droom om te doen. Volg JOU droom. Nie jou ma of pa of jou onderwysers se droom vir jou nie.
6. Skool-vriendinne is nie alles nie. Bitter min van die mense wat saam met jou op skool is, gaan jou vriende wees oor 20 of 30 jaar. As jy gelukkig is, is daar een of twee – en dis hulle wat gaan tel. 
7. Jou ouers het die beste bedoelings. Al maak hulle jou hoe kwaad en kan jy nie wag om onafhanklik te wees nie – wanneer die “julle weet wat” die fan strike, is hulle jou vangnet. Altyd.
8. Moenie die hele tyd worry oor jou gewig nie. Jy gaan jare van bekommernis daaroor hê na jy ‘n kind of twee of drie gehad het. Maer mense is nie gelukkiger nie. En om ‘n ma te word, is die beste ding wat in elk geval ooit met jou sal gebeur. Niks op aarde is beter as dit nie.
9. Jy kan self jou eie huis koop eendag. Jy kan self jou eie kar koop. Strewe na onafhanklikheid. Baklei hard teen wat die lewe na jou kant toe gooi en leer om op jou eie voete te staan.  Dis ‘n wonderlike gevoel wanneer jy daar uitkom.
10. Moet nooit ooit dink jy is beter as iemand anders nie. Want dan leer die lewe jou ‘n les. Be kind.  

Baie liefde en sterkte aan die matrieks met die eksamens!